علاش حنا ماكانقراوش ؟ كاين اللي غادي ينوض ليا في التعليقات و يقول ليا "لا نتا كذاب .. انا مثقف و واعر عليك .. انا كانقرا 50 كتاب في النهار .." .. باشي نساليوها دابا .. انا كاندوي على الاغلبية الساحقة اللي كاندخل ضمنها حتا انا ~الله يعفو~ ..
علاش ماكانقراوش ؟
ربما :
- كاتبان لينا القراية عياقة ..
- واليدينا ماولفوش لينا القراية من صغرنا ..
- ما عندناش الوقت (او حنا ماكانديروش ليها الوقت) ..
- ما عندناش الڭانة نشدو كتاب نضربو بيه ساعتين ..
- ماعارفينش الفوائد ديال القراية ..
- ماعندناش شي حافز باش نبداو نقراو ..
- المكتبات قلال في الاحياء دياولنا ..
- المجتمع ڭاعما مسوق للقراية .. (الانسان ابن بيئته)
- لعاقة ماكيناش باش نشريو الكتوبا ..
و الاسباب (او الاعذار) ماكاتساليش .. راك عارف راصك .. إيلا جبدك ماغاديش تسكت .. علاش ؟ حيت ماقاريش .. ديما نتا لي عندك الحق .. (ماشي حيت مغربي كيفما غاتفكر :3 )
واش هاد الاسباب كافيين باش ماتقراش ؟
- القراية ماشي عياقة (راك عارفها) ..
- ماتلومش ناس آخرين على الحالة اللي نتا فيها دابا .. هاداك نتا .. إيلا باغي تبدل غاتبدل ..
- بالنسبة للوقت .. إيلا قريتي 5 دقايق في النهار .. غاتكون كملتي 8 لكتوبا في عام واحد .. 20 دقيقة => 30 كتاب .. ساعة => 100 كتاب !
=> إذن بلاما تقول ليا ماعنديش الوقت .. وقتك ديالك راصك .. نتا لي غاتعرف تنظمو ..
- بالنسبة للڭانة .. شد كتاب 5 دقايق .. ماتقدرش تصبر 5 دقايق .. و تانتا كون ذكي .. سير للكتوبا اللي كايعجبوك .. ماتمشيش لشي حاجة حامضة بالنسبة ليك و اتقول القراية كلها حامضة
- بالنسبة لفوائد القراية .. :
- غادي تحسن من المستوى المالي ديالك .. (غاتولي ملعق كثر .. )
- غادي تبدل الشوفة ديالك للعالم كلو ..
- غادي تولي تعيق بشي لعبات ماكنتيش عارفهم ..
- غادي تولي تفهمها طايرا ..
- غادي تولي تقشع بنادم آش بغاك من لخر ..
- غادي تعلم مهارات جداد ..
- غادي تطور المهارات دياولك دابا ..
- غادي تولي من هاديك النخبة المثقفة في المجتمع => يعني غاتزاد قيمتك في المجتمع .. غايتزاد احترامك ..
- غادي تغير حياتك بالكامل (ايلا كنتي تاتقرا بزاف) ..
- غادي تغير حياة الناس اللي عزاز عليك (للافضل بطبيعة الحال) ..
- غادي تولي كاتعقل بزاف (زعما الذاكرة كاتتحسن) ..
- كاتزاد المعرفة ديالك .. (واو جديدة هاد المعلومة :3 ) ..
- إيلا بغيتي تولي محترف فشي ميدان .. بدا تقرا عليه .. غايعجبك الحال :) ..
- غايتزاد المعجم ديالك :) الڤوكابيلير (vocabulaire) ..
- تيتيز عزيز عليهم بنادم لي كايكون كايقرا لكتوبا ..
- غاتولي مثير للاهتمام اكثر ..
- كاتولي كاتكتب حسن .. الاسلوب ديالك كايولي زوييين .. و حلوو ..
- القراية ممتعة .. فيها حلاوة ولا اروع .. خاصك تجربها عاد تحكم ;)
- اكبر حافز بالنسبة ليك تقدر تلقاه مابين فوائد القراءة .. و اكبر حافز بالنسبة ليا .. هو اللعاقة ..
- بالنسبة للعيبات ديال المكتبات قلال و اللعاقة ماكيناش باش نشريو كتوبا .. الانترنيت فيها كلشي ..
اي كتاب بغيتيه غاتلقاه فآآآآابوووووووووووور .. آش بغيتي مازال ؟ الخبرة ديال آلاف السنين فابور ..
1) سير لجوجل
2) كتب فجوجل تحميل " السمية ديال الكتاب" pdf
3) تيليشارجي لكتاب من شي موقع غايبان ليك
=> إيلا ماخدمش ليك في البيسي انسطالي هاد اللعيبة باش يخدم Adobe Reader
(ebooks) الكتوبا pdf اصلا خفاف في الحجم ديالهم و تقدر تدير اكثر من الف كتاب في كارت ميموار ديال 2 جيغا ..
" ليس كل القُرَّاءِ قائدون .. لكن كل القائدين: قُرَّاءٌ !"
نوطا بيني: إيلا لقيتي شي اخطاء في الكتبة .. سمح ليا .. راه ماقاريش ..
بوسط سكريبطوم: انا ماشي ماكانقراش ڭاع .. كانقرا شي 2 كتوبا في الانترنت في السيمانة كايدويو علا اللعاقة .. و لكن كانعتبر راصي ماكانقراش حيتاش مازآآآل بزاف ديال اللعيبات ڭاعما قستهم..
نوطا بيني 2 : دابا كون درت غير علاش حنا ماكانقراوش ... كان غادي يكون الموضوع متجه للسلبية .. خاصني ضروري نزيد الحلول باش نكونو إيجابيين شوية :)
واحد الفيديو .. زوين .. ديال أسامة بودربالة .. تفرج فيه :
شي لعيبات زوينين يقدرو يعجبوك :
- + كيفاش تقرا كتاب في 5 دقايق ..
- +11 فائدة للقراية ...
- + تبع هاد خونا ..
- + اراجيك
- مجموعة ديال الكتوبا قيمة خاصك ماتضيعش شبابك قبل ماتقراهم ..
- +كتاب "السر" .. (هادا ايلا ماقريتيهش غادي تضيع فرصة عمرك)
- او تفرج في الفيلم .. فيلم السر بالعربية .. فيلم السر بالانجليزية
- صمتاً - الحلقة 25 - إقرأ كي تحيا